Ілава вядома з 1668 года як фальварак. У 1885 годзе маёнтак Будслаўскай воласці Вілейскага павета Віленскай губерні, мелася вінакурнае прадпрыемства, якое было пабудавана ў 1832 годзе. У 1904 годзе маёнтак належаў памешчыку Акушку, у ім пражываў 41 жыхар.
Сядзіба ў Ілаве сфарміравалася ў другой палове ХІХ стагоддзя. Яе тэрыторыя дзеліцца на парадны партэр і пейзажны парк. Парадны партэр зменены новымі будынкамі і пасадкамі дрэў. Пейзажная частка парка таксама захавалася часткова. Тут пераважаюць ліставыя пароды дрэў. У заходняй частцы парка захаваліся лістоўніцы.
Сядзібны дом драўляны, аднапавярховы, складаны ў планіроўцы, пабудаваны ў эклетычных формах. Цяпер унутраная планіроўка часткова зменена. Захаваліся драўляная сядзібная хата, фрагменты парка і бровар, пабудаваны з бутавага каменя і валуноў.
